अपार्टमेंटच्या पार्किंगमधून बुलेट लंपास : चोरट्यांच्या शोधासाठी सीसीटीव्ही कॅमेऱ्यांचा आधार
बुटीबोरी : अलीकडे बुटीबोरी शहरात दुचाकी वाहने चोरीला जाण्याचे प्रमाण वाढले आहे. शहरातील नागपूर- वर्धा मार्गालगत असलेल्या टेकटाऊन कॉलनीतील अपार्टमेंटच्या पार्किंगमधून बुलेट चोरीला गेल्याची घटना बुधवारी (दि. ३) सकाळी उघडकीस आली. चोरट्यांचा शोध घेण्यासाठी पोलिसांना सीसीटीव्ही कॅमेऱ्यांच्या फुटेजचा आधार असल्याचे नागरिकांनी सांगितले.
अमूल्य राधामोहन श्रीचंदन (४४, रा. टेकटाऊन कॉलनी, एसीसी चौक, बुटीबोरी, ता. नागपूर ग्रामीण) हे बुटीबोरी एमआयडीसी परिसरातील कंपनीत करतात. त्यांनी मंगळवारी (दि. २) सायंकाळी कंपनीतून परत आल्यावर त्यांची एमएच-४०/बीवाय- ५८०९ क्रमांकाची बुलेट नेहमीप्रमाणे अपार्टमेंटच्या पार्किंगमध्ये लॉक करून ठेवली होती.
बुधवारी सकाळी ७ वाजताच्या सुमारास ती बुलेट गायब असल्याचे त्यांच्या लक्षात आले. त्यांनी परिसरात शोध घेतला असता, ती कुठेही आढळली नाही. त्यामुळे त्यांनी पोलिसांत तक्रार दाखल केली.आठवडाभरातील दुचाकी वाहन चोरीची ही दुसरी घटना होय.
पोलिसांनी या दोन्ही ठिकाणांसोबतच परिसरातील सीसीटीव्ही फुटेज तपासायला व त्यातून मिळणाऱ्या सुगाव्याच्या आधारे चोरट्यांपर्यंत पोहोचायला सुरुवात केली आहे. याप्रकरणी बुटीबोरी पोलिसांनी अज्ञात चोरट्यांविरुद्ध गुन्हा दाखल करून तपास सुरू केला आहे
