बुटीबोरी परिसरातील कराटेपटूंनी आंतरराष्ट्रीय स्तरावर आपली चमक दाखवत ऐतिहासिक कामगिरी बजावली आहे. २५ व २६ मे २०२५ रोजी नेपाळची राजधानी काठमांडू येथे आयोजित आंतरराष्ट्रीय कराटे स्पर्धेत (International Karate Championship) बुटीबोरीच्या १२ विद्यार्थ्यांनी भाग घेतला आणि एकूण १६ पदकांची कमाई करत महाराष्ट्राचे तसेच भारताचे नाव उज्ज्वल केले.
ही स्पर्धा Nepal Shotokan Karate Association यांच्या आयोजनाखाली पार पडली. या स्पर्धेत विविध देशांतील आणि राज्यांतील कुशल कराटेपटूंनी सहभाग घेतला होता. अशा कठीण स्पर्धेत बुटीबोरीतील विद्यार्थ्यांनी दाखवलेला आत्मविश्वास, कौशल्य आणि संयम स्तुत्य आहे.
या विद्यार्थ्यांना सेन्सेई सुधीर रिंके यांचे मोलाचे मार्गदर्शन लाभले. सुधीर रिंके हे ब्लॅक बेल्ट ३रा डान असून TSRKKO महाराष्ट्राचे सचिव म्हणून कार्यरत आहेत. त्यांनी केवळ प्रशिक्षक म्हणून नव्हे तर स्पर्धक म्हणून देखील भाग घेऊन सुवर्ण पदक मिळवले. त्यांच्या प्रेरणादायी नेतृत्वामुळेच विद्यार्थ्यांनी आंतरराष्ट्रीय मंचावर दमदार कामगिरी केली.
पदक विजेते व त्यांची कामगिरी:
- सुधीर रिंके – १ सुवर्ण पदक
- देवांशु डबुर्कर – २ रौप्य पदके
- आर्यन किटे – १ रौप्य व १ कांस्य पदक
- आदित्य थोते – १ रौप्य पदक
- विराज डांगे – १ रौप्य पदक
- तनय घाटे – १ रौप्य पदक
- अनुज कवळे – २ कांस्य पदके
- सागर सोनी – १ कांस्य पदक
- स्वस्तिक वाहिले – १ कांस्य पदक
- वेदांत कवळे – १ कांस्य पदक
- सानिका बेले – १ कांस्य पदक
- अथर्वी कांबळे – १ कांस्य पदक
या सर्व विद्यार्थ्यांनी विविध वयोगटांतील काता आणि कुमिते या प्रकारांत आपली कुशलता दाखवत स्पर्धकांमध्ये उत्कृष्ट ठरले.
स्पर्धेच्या निमित्ताने बुटीबोरीतील कराटे संस्कृतीला नवसंजीवनी मिळाली असून ही कामगिरी इतर विद्यार्थ्यांसाठी प्रेरणादायी ठरणार आहे.
सेन्सेई सुधीर रिंके म्हणाले, “या मुलांनी प्रचंड मेहनत घेतली आहे. आंतरराष्ट्रीय स्पर्धेत सहभाग घेणे हेच मोठे पाऊल असते, पण त्यांनी पदके जिंकून दाखवल्याने आनंद द्विगुणित झाला आहे. पुढील टप्प्यांसाठी आम्ही अधिक जोमाने तयारी करणार आहोत.”
या यशामागे विद्यार्थ्यांची निष्ठा, पालकांचे पाठबळ, शाळा आणि स्थानिक संस्थांची साथ यांचा मोलाचा वाटा आहे. बुटीबोरी परिसरातून इतक्या मोठ्या प्रमाणावर आंतरराष्ट्रीय पातळीवर पदक विजेते घडले जाणे ही निश्चितच अभिमानास्पद गोष्ट आहे.
या सर्व खेळाडूंना आणि त्यांच्या प्रशिक्षकांचे मनःपूर्वक अभिनंदन आणि पुढील वाटचालीसाठी शुभेच्छा!
